聯賽Class 10冠軍達成 *2 及心得

Class 10隊伍最弱嗰隊都有5萬8，最強當然有油王嘅13萬7千戰力同其餘排頭二十嘅隊伍。

呢隻game好得意，除咗課金之外，抽重複球員先係王道，用嚟覺醒球員。唔似足球小將咁，只可以升技，仲要升得嗰1 level...同黑波有咩分別，坑到爆！

而喺CM，抽到新的話，反而會出現人滿之患，例如皇馬Forza，四個球員都係中前場，齊晒四隻，有機會冇位俾佢哋出場。

金字塔愈高層，球隊戰力愈高。以我觀察所得，每一次抽籤，電腦會安排兩至三隊高於自己戰力嘅隊、兩至三隊同自己差唔多戰力同2隊低於自己戰力嘅對手同組，而高戰力隊都係高過自己最盡10000左右，有一定勝算(所以上到Class 10打咗8季都未撞到油王RezI.FC)。

喺Class 10拎冠軍關鍵有三個

1. 用手動打

2. 做好防守減少失球

3. 有強勁進攻主力

第一點手動唔講，大家都知...講下第二點「做好防守，減少失球」

當我上到Class 8之後，雖然3-5-2係當時最高戰力嘅陣，但後防失球愈嚟愈多，都要引痛改升多幾個後衛(之前升中前場球員為主)，留咗一兩次級，升左右閘到突4、可以覺1，於是可以打4-2-3-1 同 5-4-1 陣容。效果良好，亦同時升到Class 9，然後拎第二留咗次級，再升多少少啲後防，又買咗費蘭甸奴同基力治連攜，戰力提升唔少!! 之後就上Class 10。

Class 10雖然未遇過油王，但對住啲7/8萬球隊都有啲吃力。再升下後防技能同盡快將所有後衛突5。情況慢慢改善，由第六、第三、第四、第三...最後拎到第一。

以下係Class 10 冠軍陣容

我係打4-2-3-1，基本上正選5星全部MAX 兼覺1或以上，6星全部Level 60不過只係突5。兩個後衛先用甘賓尼不停出「曲者の動き」減對手前鋒能力值，當前鋒想射，邦路斯就出「全消しブロツク」對方得返個位數成功率...

當然呢個組合好多時出唔到技，咁咪失球... 始終係電腦控制防守....

我喺連登建議各巴打查維馬天尼斯唔好打中場，自己就放佢打中場，出爾反爾....

其實防中呢個位原先係卡域克打嘅，但係我要打主線拎突6素材，去到19章後，啲電腦隊下下屈「スラツガー」入波，我先焗住用佢試下，又幾OK喎，就Keep住冇再換啦....

第一次Class 10 聯賽冠軍...

第二點「有強勁進攻主力」

睇睇我第二次拎Class 10冠軍時邊個係神射手...

前鋒拉舒福特呢?應該入少過10球...點解係普巴而唔係前鋒入得多? 因為佢唔係覺2。

戰力差成2000咁多，梗係搵個勁啲嘅增加入球成功率。另外，中場球員遠射可以避開對方後防出BLOCK技(勁多高戰力隊有6星泰利、沙治奧拉莫斯...)

冇普巴咪贏唔到勁隊?? 經理人手紙咪有5星菲臘比安達臣，覺2一樣咁勁。

唔好誤會只係中場先識得入強隊波!!! 如果你嗰隊中場球員嘅技能係交波為主，你嘅強勁進攻主力就變成前鋒而唔係中場啦，每隊隊伍球員唔同，打法唔同，唔可以一本通書睇到老。

但有樣嘢係不變，總之愈覺醒得多，能力愈勁。這就是「由他去」師兄喺連登每日一小嘅原因。

而家大家應該會知咩嘢叫強勁嘅主力啦~~  祝大家係聯賽百戰百勝，早日喺Class 10封王!

#モバサカc  #モバサカcm